Sýnataka frá hvekk, blöðruhálskirtli
Fjöldi sýna er breytilegur í hverri lotu. Sýnin eru tekin um endaþarm. Ástæða sýnatöku er yfirleitt sú að grennslast fyrir um hvort krabbamein getir verið til staðar eður ei í blöðruhálskirtli. Stöku sjúklingar þurfa að undirgangast endurtekna sýnatöku.
Helstu fylgikvillar, sem eru mögulegir:
Alltaf eru einhver ónot við stunguna, en flestir þola þetta vel. Ekki eru að jafnaði gefin nein verkjalyf eða slökunarlyf í æð, en stundum gert í svæfingu eða staðdeyfingu. Þú þarft ekki að mæta fastandi, nema um svæfingu sé að ræða.
Flestir sjá blóð í þvagi í staka daga eftir sýnatökuna, stundum lengur og einnig er venjulegt að sæðið verði brún- eða blóðlitað í allt að 4-6 vikur. Aukin þvaglátaþörf, sviði í þvagrásinni og blóðlitur á salernispappír eða jafnvel utan á hægðum eftir hægðalosun er ekki óeðlilegt í fáeina daga á eftir. Þessi einkenni hverfa venjulega sjálfkrafa, en ef þú færð hita eða hroll þá skaltu hafa samband við lækni. Stöku sjúklingar eiga einnig í erfiðleikum með að tæma blöðruna fyrstu dagana á eftir, en ef þvaglátin verða miklum erfiðleikum háð eða þú færð þvagteppueinkenni (getur ekki pissað), þá skaltu einnig hafa samband við lækni. Á meðan blóð kemur í þvaginu, þá skaltu forðast erfiði, en rétt er að gera slíkt að jafnaði í 1-2 d. á eftir sýnatökuna, en lengur ef þú ert ekki alveg eins og vanalega. Kynlíf má stunda ef þér líður vel og litarbreyting á sæði er ekki smitandi ástand eða hættulegt eitt sér.
Læknirinn hefur siðan samband við þig að nýju þegar niðurstaða hefur borist úr sýnatökunni ("ræktuninni"), venjulegast innan 2 vikna og ræður hún því hvað gera þarf í framhaldinu. Hann lætur þig einnig vita um töku blóðþynnandi lyfja ef þú skyldir hafa tekið slík lyf áður og þurft að hætta töku þeirra fyrir sýnatökuna.